Bleyjuskipti

Að skipta um bleyju hjá fyrirbura getur verið flókið verkefni. Barn í hitakassa er með ótal snúrur og tæki tengt við sig sem foreldrar gætu óttast að snerta. Ef barnið er fætt mikið fyrir tímann er það ekki með bollulegan ungbarnarass, heldur er það grannt og veikburða að sjá og húðin krumpuð (1). Kynfæri fyrirbura hafa ekki enn náð sama þroska og hjá fullburða nýburum og geta verið viðkvæm. Skapabarmar stúlkna sem fæddar eru mikið fyrir tímann eru enn opnari en hjá fullburða stúlkubörnum og pungur drengja getur verið hlutfallslega stærri en hjá fullburða dengjum en kynfærin munu breytast og þroskast (2). Barnið gæti virkað svo viðkvæmt að foreldrar treysti sér illa að lyfta barninu upp til að taka bleyjuna af. Foreldrar geta samt vel séð um bleyjuskiptin þó þeir þurfi eflaust aðstoð í fyrstu og leiðbeiningar um hvernig eigi að meðhöndla barnið. Á Vökudeildinni eru notaðar grisjur sem bleyttar eru í vatni til að þvo börnum um bleyjusvæðið. Fyrst um sinn fá börnin sem eru í hitakassa nýja bleyju í kassanum. Þau sem eru í vöggu fá nýja bleyju á skiptiborði sem staðsett er undir hitalampa. Bleyjuskipti geta verið ánægjuleg og notaleg stund fyrir foreldra og barn.

Heimildir:
  1. Madden, S. L. (2000). The Preemie Parents´ Companion: A Essential Guide to Caring for Your Premature Baby in the Hospital, at Home and Though the First Years. Boston: The Harvard Common Press.
  2. Gardner, S. L. og Johnson, J. L. (2006). Initial nursery care. Í G. B. Merenstein og S. L. Gardner (Ritstj.), Handbook of Neonatal Intensive Care (6. útgáfa, bls. 79-121). St. Louise: Mosby.